రాజకీయాల్లో ఎప్పుడు ఎవరు ఎవరికి శత్రువు అవుతారో, ఎప్పుడు ఏ మలుపు తిరుగుతారో ఊహించడం కష్టం. సరిగ్గా ఇదే కోవలోకి వస్తారు వైసీపీ(YCP) మాజీ నేత విజయసాయిరెడ్డి. ఒకప్పుడు పార్టీకి ప్రధాన బలంగా, అధినేత వైఎస్ జగన్‌మోహన్‌రెడ్డికి అత్యంత సన్నిహితుడిగా మెరిసిన ఆయన.. ఇప్పుడు పార్టీకి దూరం కావడమే కాకుండా, తనదైన శైలిలో పొలిటికల్ సర్కిల్స్‌లో సరికొత్త చర్చకు తెరలేపారు. తాజాగా తిరుపతి గడ్డపై నుంచి ఆయన సంధించిన అస్త్రాలు ఇప్పుడు రాష్ట్ర రాజకీయాల్లో హాట్ టాపిక్‌గా మారాయి.

ఈ తాజా పరిణామాల్లో భాగంగా సాయిరెడ్డి చేసిన వ్యాఖ్యలు కేవలం రాజకీయ విమర్శలకే పరిమితం కాలేదు. ఏకంగా వ్యక్తిగత విశ్వాసాలు, మతపరమైన ద్వంద్వ ప్రమాణాల అంశాన్ని ఆయన తెరపైకి తెచ్చారు. చంద్రబాబు నాయుడు(Chandrababu Naidu) కులాన్ని అడ్డంపెట్టుకుని రాజకీయం చేస్తున్నారంటూనే, జగన్‌మోహన్‌రెడ్డి మతాన్ని నమ్ముకుని ముందుకు వెళ్తున్నారంటూ సంచలన విశ్లేషణ చేశారు. అయితే, ఈ విమర్శలన్నింటికంటే హైలైట్‌గా నిలిచింది మాత్రం ఆయన జగన్‌కు ఇచ్చిన 'ఉచిత సలహా' అనే చెప్పాలి.

జగన్‌(Jagan)కు రెడ్డి వర్గపు ఓట్లు కావాలంటే ఆయన తన ద్వంద్వ వైఖరిని విడనాడాలని సాయిరెడ్డి సూచించారు. క్రిస్టియానిటీ నుంచి పూర్తిగా హిందూ మతానికి రావాలని, అప్పుడే ఆయన పెట్టుకున్న పేరుకు అసలైన సార్థకత దక్కుతుందని ఆయన అభిప్రాయపడ్డారు. కేవలం రాజకీయ లబ్ధి కోసం ఒక వర్గానికి ఒకలా, మరో వర్గానికి మరోలా చెప్పుకుంటూ ప్రజలను మోసం చేయడం తగదని ఆయన హితవు పలికారు. అంతేకాదు, ఒకవేళ జగన్ హిందూ మతంలోకి వస్తే పార్టీలకు అతీతంగా తామంతా ఆయన్ని అక్కున చేర్చుకుని ఆహ్వానిస్తామంటూ ఒక ఆఫర్ లాంటి ప్రకటన కూడా చేయడం గమనార్హం.

మరోవైపు, ఈ ప్రెస్‌మీట్‌లో సాయిరెడ్డి చేసిన ఇతర వ్యాఖ్యలు కూడా పరోక్షంగా తీవ్ర దుమారాన్ని రేపుతున్నాయి. ఇతర మతాల వారు హిందూలయాలకు వచ్చినప్పుడు వ్యవహరించే తీరుపై ఆయన కొన్ని సున్నితమైన, వివాదాస్పద వ్యాఖ్యలు చేశారు. తాము ఏ మత ప్రార్థనా మందిరానికైనా వెళ్లి అక్కడి సంప్రదాయాలను గౌరవిస్తామని, కానీ ఇతర మతాల వారు మాత్రం గుడికి వచ్చినా ప్రసాదం స్వీకరించే పరిస్థితి ఉండదని, చివరకు తీర్థం తీసుకునే విషయంలోనూ భయపడతారని ఆయన విమర్శించారు. ఈ వ్యాఖ్యలు పరోక్షంగా వైఎస్ భారతిని ఉద్దేశించి చేసినవేనని రాజకీయ పరిశీలకులు విశ్లేషిస్తున్నారు. మొత్తానికి, వైసీపీని వీడి కొత్త రాజకీయ ప్రయాణానికి సిద్ధమవుతున్న విజయసాయిరెడ్డి(Vijayasai Reddy).. ఇప్పుడు నేరుగా మతపరమైన అంశాలను రాజకీయ అస్త్రాలుగా మలచడం ఏపీ రాజకీయాల్లో పెద్ద చర్చకు దారితీసింది. ఈ విమర్శలు రాబోయే రోజుల్లో ఎలాంటి పరిణామాలకు దారితీస్తాయో వేచి చూడాలి.