నువ్వేం సీఎం.. రేవంత్‌పై సొంత MLA తిరుగుబాటు.!

admin
Published by Admin — November 18, 2026 in Politics, Telangana
News Image

తెలంగాణ కాంగ్రెస్(Telangana Congress) రాజకీయాల్లో ఒక్కసారిగా పెను ప్రకంపనలు రేగాయి. సొంత పార్టీ ప్రభుత్వ తీరుపై, ముఖ్యమంత్రి రేవంత్ రెడ్డి పనితీరుపై నల్గొండ జిల్లా మునుగోడు ఎమ్మెల్యే కోమటిరెడ్డి రాజగోపాల్ రెడ్డి చేసిన తాజా వ్యాఖ్యలు ఇప్పుడు రాష్ట్ర రాజకీయ వర్గాల్లో హాట్ టాపిక్‌గా మారాయి. ప్రతిపక్షాలు చేసే విమర్శల కంటే ఘాటుగా, ఏకంగా సొంత పార్టీ ఎమ్మెల్యేనే సీఎంను ప్రశ్నించడం, "నువ్వేం ముఖ్యమంత్రి? ఆ భాష ఏంటి?" అంటూ నిలదీయడం రాజకీయంగా తీవ్ర దుమారం రేపుతోంది. కాంగ్రెస్ పార్టీ అధికారంలోకి వచ్చి మూడేళ్లు గడుస్తున్నా, ప్రజలు ఆనందంగా లేరంటూ ఆయన కుండబద్దలు కొట్టడం పార్టీలో అంతర్గత కలహాలను బహిర్గతం చేస్తోంది.

గత బీఆర్ఎస్ ప్రభుత్వ హయాంలో కేసీఆర్ కేవలం సిరిసిల్ల, సిద్దిపేట, గజ్వేల్ ప్రాంతాలకే పెద్దపీట వేశారని, అప్పట్లో తాను నిధుల కోసం తీవ్రంగా పోరాడానని రాజగోపాల్ రెడ్డి(Komatireddy Rajagopal Reddy) గుర్తుచేశారు. అయితే, ఇప్పుడు కాంగ్రెస్ ప్రభుత్వంలోనూ అదే పాత పద్ధతి పునరావృతమవుతోందని ఆయన మండిపడ్డారు. సీఎం రేవంత్ రెడ్డి కొడంగల్‌కు, మంత్రులు ఉత్తమ్ కుమార్ రెడ్డి, భట్టి విక్రమార్క తమ సొంత నియోజకవర్గాలైన హుజూర్‌నగర్, మధిర అభివృద్ధి గురించే ఆలోచిస్తున్నారే తప్ప, మిగతా ప్రాంతాలను పట్టించుకోవడం లేదని ఆరోపించారు. కొడంగల్ అభివృద్ధికే రూ.10 వేల కోట్లు కేటాయించుకున్న సీఎం, దశాబ్దాలుగా ఫ్లోరైడ్ విషం తాగుతున్న మునుగోడు ప్రజల గోడును మాత్రం పట్టించుకోవడం లేదని కోమటిరెడ్డి ఆవేదన వ్యక్తం చేశారు. కనీసం చెరువుల అభివృద్ధికి రూ.500 కోట్లు కూడా కేటాయించకపోవడంపై ఆయన నిప్పులు చెరిగారు.

నియోజకవర్గ సమస్యలను నాలుగు గోడల మధ్య ప్రస్తావిస్తే ఎవరూ పట్టించుకోవడం లేదని, బాధ్యుల దృష్టికి తీసుకెళ్లినా ఫలితం లేకపోవడంతోనే తాను జనంలోకి వచ్చి బహిరంగంగా మాట్లాడాల్సి వచ్చిందని రాజగోపాల్ రెడ్డి స్పష్టం చేశారు. ఈ క్రమంలోనే కొడంగల్ నిధుల గురించి ప్రశ్నించిన తనను ఉద్దేశించి సీఎం రేవంత్ రెడ్డి(CM Revanth Reddy) 'పండబెట్టి తొక్కుతా' అనడాన్ని ఆయన తీవ్రంగా తప్పుపట్టారు. రాష్ట్రానికి తండ్రిలా ఉండాల్సిన ముఖ్యమంత్రి స్థానంలో ఉండి ఇటువంటి భాష మాట్లాడటం సరికాదని, ప్రాంతాల మధ్య వివక్ష చూపడం దారుణమని హితవు పలికారు. మంత్రి పదవి లేకపోయినా తనకు పర్వాలేదని, ప్రజా సమస్యలపై పోరాటం మాత్రం ఆపేది లేదని ఆయన తేల్చిచెప్పారు.

ఇప్పటికైనా ప్రభుత్వం తన వైఖరి మార్చుకుని మునుగోడుకు రావాల్సిన నిధులను వెంటనే విడుదల చేయాలని, లేనిపక్షంలో మరో కురుక్షేత్ర యుద్ధం తప్పదని ఆయన ప్రభుత్వానికి డెడ్‌లైన్‌ విధించారు. మొత్తానికి సొంత పార్టీ ఎమ్మెల్యే చేసిన ఈ సంచలన వ్యాఖ్యలు, తిరుగుబాటు బావుటా కాంగ్రెస్(Congress) హైకమాండ్‌కు తలనొప్పిగా మారగా, వచ్చే పరిణామాలు ఏ విధంగా ఉండబోతున్నాయనే దానిపై సర్వత్రా ఉత్కంఠ నెలకొంది.

Tags
Komatireddy Rajagopal Reddy CM Revanth Reddy Telangana Politics Congress Munugode Telangana News
Recent Comments
Leave a Comment

Related News