జులై 10.. తెలుగు సినిమా చరిత్రలో ఎప్పటికీ నిలిచిపోయే రోజు. పదేళ్ల కిందట సరిగ్గా ఇదే రోజు తెలుగు సినిమా చరిత్రలో సరికొత్త అధ్యాయం మొదలైంది. ఒక రకంగా చెప్పాలంటే ఇండియన్ ఫిలిం హిస్టరీలోనే ఆ రోజును గొప్ప మలుపుగా చెప్పొచ్చు. అప్పటిదాకా ఏ భారతీయ దర్శకుడి ఊహకూ అందని ఓ అద్భుత ప్రపంచాన్ని వెండితెరపై ఆవిష్కరించి సంచలనం రేపాడు మన దర్శక ధీరుడు రాజమౌళి. ఆ సినిమాలో విజువల్స్ చూసి మైమరచిపోని ప్రేక్షకుడు లేడు. ఆ తర్వాత భారతీయ సినిమాల కథలు మారిపోయాయి.

బడ్జెట్లు పెరిగిపోయాయి. మన దర్శకుల విజన్‌లో అనూహ్యమైన మార్పు వచ్చింది. ఇప్పుడు రామాయణ, మహాభారత గాథలను వేల కోట్ల బడ్జెట్లలో తెరకెక్కించే ప్రయత్నాలు జరుగుతున్నాయంటే అందుకు పునాది వేసింది ‘బాహుబలి’నే. తొలిసారి వెండితెరపై ఈ సినిమా చూసినపుడు భారతీయ ప్రేక్షకులు పొందిన అనుభూతి గురించి ఎంత చెప్పినా తక్కువే. ఇప్పుడు మళ్లీ ప్రేక్షకులకు గొప్ప అనుభూతిని కలిగించడానికి బాహుబలి మళ్లీ రాబోతోంది. కొన్నేళ్లుగా టాలీవుడ్‌ను ఊపేస్తున్న రీ రిలీజ్ ట్రెండును బాహుబలి సైతం అందిపుచ్చుకుంటోంది.