విశాఖను ఏపీ ఆర్థిక రాజధానిగా చేస్తామని ఐటీ శాఖా మంత్రి నారా లోకేశ్ అన్నారు. అంతేకాదు, 2047 నాటికి ట్రిలియన్ డాలర్ ఆర్థిక వ్యవస్థగా విశాఖను అభివృద్ధి చేస్తామని చెప్పారు. ఒకే రాష్ట్రం-ఒకే రాజధాని...అభివృద్ధి వికేంద్రీకరణ కూటమి ప్రభుత్వ విధానమని తెలిపారు. హైదరాబాద్ అభివృద్ధికి 30 ఏళ్లు పట్టిందని, విశాఖను అభివృద్ధి చేసేందుకు పదేళ్ల సమయం చాలని అన్నారు. భారతదేశ చరిత్రలోనే అతిపెద్ద విదేశీ ప్రత్యక్ష పెట్టుబడి దక్కించుకున్న రాష్ట్రంగా ఆంధ్రప్రదేశ్, నగరంగా విశాఖ చరిత్రపుటల్లో నిలిచిపోయాయన్నారు.

విశాఖలో డేటా సెంటర్, ఓపెన్ కేబుల్ ల్యాండింగ్ స్టేషన్ ప్రారంభించిన తర్వాత లోకేశ్ కీలక వ్యాఖ్యలు చేశారు. 1990లో సీఎం చంద్రబాబు కృషితో పలు ఐటీ సంస్థలు హైదరాబాద్ కు వచ్చాయని, దీంతో, ఆయన సైబర్ టవర్స్ ను నిర్మించారని చెప్పారు. సైబర్ టవర్స్ తర్వాత అనేక సంస్థలు హైదరాబాద్ కు వచ్చి ఆ నగరం అభివృద్ధి చెందిందని అన్నారు. అయితే, ఆ రేంజ్ లో డెవలప్ అయ్యేందుకు విశాఖకు పదేళ్లకు మించి పట్టదని ధీమా వ్యక్తం చేశారు. రాష్ట్రంలో పెట్టుబడులు తెచ్చేందుకు తమ ప్రభుత్వానికున్న కమిట్ మెంట్. శ్రమను ప్రజలు గుర్తించాలన్నారు.