సింగపూర్‌లో నివసిస్తున్న ప్రవాసాంధ్రుల చిరకాల కోరిక చివరకు నెరవేరింది. ఎంతోకాలంగా నిలిచిపోయిన సింగపూర్–విజయవాడ అంతర్జాతీయ విమాన సర్వీసు మళ్లీ ప్రారంభం కానుండటంతో సింగపూర్ APNRT (ఆంధ్రప్రదేశ్ NRI తెలుగు సొసైటీ) సభ్యులు తమ ఆనందాన్ని వ్యక్తం చేశారు. ఈ నిర్ణయం రెండు ప్రాంతాల మధ్య సంబంధాలను మరింత బలపరుస్తుందని, ముఖ్యంగా తెలుగు ప్రజలకు ప్రయాణ సౌకర్యాన్ని విపరీతంగా మెరుగుపరుస్తుందని వారు అభిప్రాయపడ్డారు.

ఈ ఫ్లైట్ వల్ల తెలుగు ప్రజలకు సింగపూర్ తో మంచి సంబంధాలు నెలకొల్పుతాయని, ప్రయాణ సమయం కూడా బాగా తగ్గి, చార్జెస్ అందుబాటులో ఉండటం వల్ల టూరిజం బాగా డెవలప్ అవుతుంది అని భావిస్తున్నట్లు తెలుగు డయాస్పోరా సభ్యులు తెలియచేశారు. కుటుంబ సందర్శనలు, వ్యాపార ప్రయాణాలు, టూరిజం-ఆల్ ఇన్ వ‌న్‌గా ఈ ఫ్లైట్ మళ్లీ అందుబాటులోకి రావడం ప్రవాసాంధ్రులందరికీ పెద్ద ఉపశమనంగా మారింది.

ఈ ఫ్లైట్ పునఃప్రారంభానికి తీసుకున్న ముందడుగు వెనుక ముఖ్యమైన పాత్రను APNRT, రాష్ట్ర ప్రభుత్వం పోషించాయి. గత జూలైలో సీఎం చంద్రబాబు నాయుడు గారి సింగపూర్ పర్యటన సందర్భంగా జరిగిన CBN తెలుగు డయాస్పోరా మీట్ అండ్ గ్రీట్ కార్యక్రమంలో APNRT సభ్యులు ఈ విషయాన్ని అధికారికంగా ప్రస్తావించారు. ఆ అభ్యర్థనను ప్రాధాన్యంగా తీసుకున్న సీఎం చంద్రబాబు, మంత్రి నారా లోకేష్, వేమూరి రవికుమార్‌లు తక్షణ చర్యలు చేపట్టారు.

తర్వాత కేంద్ర మంత్రి కింజరాపు రామ్మోహన్ నాయుడు గారితో పాటు పలు మంత్రిత్వ శాఖలతో సమన్వయం జరిపి, కేవలం 100 రోజుల్లోనే ఈ ఫ్లైట్ సర్వీసును తిరిగి ప్రారంభించడంలో విజయం సాధించారు. ఈ వేగవంతమైన చర్యను సింగపూర్ APNRT సభ్యులు, NRI TDP నాయకులు ప్రశంసలతో కొనియాడుతున్నారు. ప్రభుత్వ స్పందన, APNRT టీమ్ కృషి ప్రవాసాంధ్రుల హృదయాలను హత్తుకుందని వారు తెలిపారు.