తెలంగాణ జాగృతి అధ్య‌క్షురాలు క‌విత సంచ‌ల‌న వ్యాఖ్య‌లు చేశారు. ముఖ్యంగా బీఆర్ ఎస్ కీల‌క నాయ కుడు, మాజీ మంత్రి హ‌రీష్‌రావు కేంద్రంగా ఆమె విమ‌ర్శ‌లు గుప్పించారు. ఆర్ ఆర్ ఆర్ అలైన్ మెంటును హ‌రీష్‌రావు, గంగుల కోస‌మే మార్పులు చేశార‌ని సంచ‌ల‌న వ్యాఖ్య‌లు చేశారు. పార్టీ అధికారంలో ఉన్న‌ప్పుడు బీఆర్ ఎస్ నాయ‌కులు సంపాయించుకున్నార‌ని.. కార్య‌క‌ర్త‌ల‌కు ఉత్త చేతులు చూపించార‌ని ఆమె దుయ్య‌బ‌ట్టారు. మోసం అనే హ‌రీష్‌రావు డీఎన్ ఏలోనే ఉంద‌ని.. అది ఆయ‌న నైజ‌మ‌ని క‌విత అన్నారు.

`జాగృతి జ‌నం బాట‌` నిర్వ‌హిస్తున్న కవిత‌.. మెద‌క్ జిల్లాలోకి ప్ర‌వేశించారు. ఈ సంద‌ర్భంగా మీడియాతో మాట్లాడారు. జూబ్లీహిల్స్ లో ఎవ‌రు గెలిచినా.. ప్ర‌జ‌ల‌కు చేసేది ఏమీలేద‌న్న ఆమె.. కొంద‌రికి ప్ర‌జ‌లు ఓటుతో బుద్ధి చెప్పారంటూ బీఆర్ ఎస్‌ను ఉద్దేశించి ప‌రోక్షంగా వ్యాఖ్యానించారు. బీఆర్ ఎస్ పార్టీలో ఒక‌రిని ఒక‌రు క‌వ్వించుకోవ‌డంతోనే స‌రిపోతోంద‌ని.. ప్ర‌జ‌ల‌ను ఆపార్టీ నేత‌లు ప‌ట్టించుకోవ‌డం లేద‌ని విమ‌ర్శించారు. కేటీఆర్ పైనా క‌విత విమ‌ర్శ‌లు గుప్పించారు. ఆయ‌న సోష‌ల్ మీడియా రాజ‌కీయాలు చేస్తున్నార‌ని ఎద్దేవా చేశారు.

జూబ్లీహిల్స్ లో ఓడిపోయిన వెంట‌నే బీఆర్ ఎస్ ఓట‌మికి త‌న‌కు సంబంధం లేద‌ని హ‌రీష్ రావు వ్యాఖ్యా నించార‌ని.. కానీ.. ఇది మోసం చేయ‌డ‌మేన‌ని చెప్పారు. గ‌తంలో కేటీఆర్‌, హ‌రీష్‌రావులు.. కృష్ణార్జున‌ల‌ని పోస్టులు పెట్ట‌లేదా? అని ప్ర‌శ్నించారు. జూబ్లీ పోరులో తాము ఎవ‌రికీ మ‌ద్ద‌తు ఇవ్వ‌లేద‌ని క‌విత వ్యాఖ్యా నించారు. చాలా మంది త‌న‌ను మ‌ద్ద‌తు కోరిన విష‌యాన్ని ఆమె చెప్పారు. అయితే.. తాము త‌ట‌స్థంగా వ్య‌వ‌హ‌రించామ‌న్నారు. ఎందుకంటే.. ఇక్క‌డ ఎవ‌రు గెలిచినా ప్ర‌జ‌ల‌కు ఒరిగేది ఏమీ ఉండ‌ద‌ని త‌న‌కు తెలుసున‌న్నారు.

కానీ... కొంద‌రు హ‌రీష్ రావు వ‌ద్ద‌కు వెళ్లి తాము ఎవ‌రికి మ‌ద్ద‌తు ఇవ్వాల‌ని అడిగిన‌ప్పుడు.. మీఇష్టం ఎవ‌రికైనా మ‌ద్ద‌తివ్వండి అని తెగేసి చెప్పిన‌ట్టు క‌విత తెలిపారు. ఇది మోసం చేయ‌డం కాదా? అని ప్ర‌శ్నించారు. ప్ర‌స్తుతం బీఆర్ ఎస్ పార్టీ సోషల్ మీడియా రాజ‌కీయాలు చేస్తోంది కాబ‌ట్టే.. జూబ్లీహిల్స్‌లో ఓడిపోయింద‌ని వ్యాఖ్యానించారు. కేడర్‌ను పెంచుకోలేదు కాబ‌ట్టే.. ఓడిపోయింద‌ని అన్నారు.