మెగా ఇంట మ‌రోసారి వెడ్డింగ్ బెల్స్ మోగ‌నున్నాయి. మెగా మేన‌ల్లుడు, టాలీవుడ్ యంగ్ హీరో సాయి దుర్గ తేజ్ తన పెళ్లిపై నెలల తరబడి సాగిన ఊహాగానాలకు స్వయంగా తెరదించారు. ఈ ఉదయం తిరుమల శ్రీవారి దర్శనం అనంతరం మీడియాతో మాట్లాడిన తేజ్, “వచ్చే ఏడాదిలోనే నా వివాహం జరుగుతుంది” అంటూ అధికారికంగా ప్రకటించారు. ఈ ప్రకటన వెలువ‌డిన వెంట‌నే సోషల్ మీడియాలో శుభాకాంక్షల వరద మొదలైంది.

సాయి తేజ్ మాట్లాడుతూ.. “శ్రీ వేంకటేశ్వర స్వామివారి ఆశీర్వాదంతో మంచి సినిమాలు, మంచి జీవితం దక్కాయి. కొత్త సంవత్సరంలో శుభారంభం కావాలని స్వామి వారి సన్నిధికి వచ్చాను. వచ్చే ఏడాదిలోనే నా వివాహం జరుగుతుంది” అని తెలిపారు. తేజ్ పెళ్లి విషయాన్ని క్లియర్ చేసినా… పెళ్లి చేసుకోబోయే అమ్మాయి ఎవరు? అనే ప్రశ్నకు చిరునవ్వుతో సమాధానం ఇచ్చే ప్రయత్నం చేశాడు. పేరు మాత్రం వెల్లడించలేదు. దీంతో సోషల్ మీడియాలో నెట్‌జన్లు ఊహాగానాలు మొదలుపెట్టారు. తేజ్ కు కాబోయే అమ్మాయి గురించి తెలుసుకునేందుకు తెగ ప్ర‌య‌త్నిస్తున్నారు,

సినిమాల విషయానికి వస్తే.. సాయి తేజ్ ప్రస్తుతం ‘సంబరాల ఏటి గట్టు’ సినిమా షూటింగ్‌లో బిజీగా ఉన్నారు. ప్రైమ్ షో ఎంటర్‌టైన్మెంట్స్ బ్యాన‌ర్ పై నిర్మిత‌మ‌వుతున్న ఈ పాన్-ఇండియా యాక్షన్ ఎంటర్‌టైనర్ కు రోహిత్ కేపీ దర్శకుడు.  ఐశ్వర్య లక్ష్మి హీరోయిన్ గా న‌టిస్తోంది. చిత్రీక‌ర‌ణ ద‌శ‌లో ఉన్న సంబరాల ఏటి గట్టు వ‌చ్చే ఏడాది ప్రేక్ష‌కుల ముందుకు రావ‌డం ఖాయంగా క‌నిపిస్తోంది.