సినీ పరిశ్రమను గ‌త కొన్నేళ్లుగా కుదిపేసిన పైరసీ వ్యవస్థలో ప్రధాన పాత్రధారి, ఐబొమ్మ వ్య‌వ‌స్థాప‌కుడు ఇమ్మ‌డి రవిని పోలీసులు అరెస్ట్ చేయడంతో టాలీవుడ్ సినీ ప్రముఖుల్లో జోష్ నెల‌కొంది. విదేశాల్లో ఉంటూ పైరసీ సామ్రాజ్యాన్ని నడిపిన రవిని నెదర్లాండ్స్ నుంచి హైదరాబాద్ రాగానే సైబర్ క్రైమ్ పోలీసులు అదుపులోకి తీసుకున్నారు. అనంత‌రం నాంపల్లి కోర్టు ర‌వికి 14 రోజుల రిమాండ్ విధించడంతో.. నిందితుడిని చంచల్‌గూడ జైలుకు తరలించారు.
 
ప్రస్తుతం రవి రిమాండ్‌లో ఉండగా,  విచారణ కోసం కస్టడీ కావాలంటూ పోలీసులు కోర్టుకు వెళ్ల‌బోతున్నారు. ఇక‌పోతే ఐబొమ్మ కార్యకలాపాలపై, రవిని అరెస్ట్ చేసిన తర్వాతి పరిణామాలపై చర్చించేందుకు టాలీవుడ్ నుంచి చిరంజీవి, నాగార్జున, రాజమౌళి, దిల్ రాజు, సురేశ్ బాబు వంటి సినీ ప్రముఖులు హైదరాబాద్ పోలీస్ కమిషనర్ సజ్జనార్‌ను ఈ రోజు ప్రత్యేకంగా కలిశారు. ఈ సందర్భంగా పరిశ్రమ ప్రయోజనాల కోసం పోలీసులు తీసుకున్న చర్యలను ప్రశంసిస్తూ, పైరసీపై మరింత కఠిన చర్యలు తీసుకోవాల్సిన అవసరాన్ని వివరించారు.

అయితే రవి విచారణలో బయటపడ్డ విషయాలు వింటే ఎవరికైనా షాకే. సినిమాలను దొంగిలించి లీక్ చేసే అక్రమ దందాలో అతను సంపాదించిన డబ్బు పరిమాణం చూస్తే మైండ్ బ్లాక్ అవ్వడం ఖాయం. సినీ ప్ర‌ముఖుల‌తో భేటీ అనంతరం సీపీ సజ్జనార్ మీడియాతో మాట్లాడుతూ.. ర‌వి గురించి విస్తుపోయే విష‌యాల‌ను రివీల్ చేశారు. తెలుగు, తమిళ్, హిందీ, కన్నడ, మలయాళ భాషలకు చెందిన వేలాది సినిమాలను రవి తన నెట్‌వర్క్ ద్వారా పైరసీ చేశాడు. అయితే అతని అసలు బిజినెస్ మోడల్ సినిమాలు మాత్రమే కాదు. పైరసీ వెబ్‌సైట్లతో పాటు బెట్టింగ్ యాప్‌ల ప్రమోషన్, మాల్‌వేర్ యాడ్స్, విదేశీ ట్రాఫిక్ మేనిప్యులేషన్.. ఇవి అన్నీ కలిసి అతడికి లక్షలు కాదు, కోట్ల సంప‌ద తెచ్చిపెట్టేవి. విచారణలో రవి సైబర్ క్రైమ్ పోలీసులకు చెప్పిన అంచనా ప్రకారం.. ఇప్పటికే రూ.20 కోట్లు పైరసీ ద్వారా సంపాదించాడని ఒప్పుకున్నాడు. ఇందులో నుంచి రూ.3 కోట్లు నగదుగా స్వాధీనం కూడా చేసుకున్నామ‌ని తాజా ప్రెస్‌మీట్‌లో స‌జ్జ‌నార్ వెల్ల‌డించారు. 

ఒక వెబ్‌సైట్‌ను బ్లాక్ చేస్తే, వెంటనే మిర్రర్ లింకు పెడుతూ మొత్తం 65 వెబ్‌సైట్లను ఆపరేట్ చేసినట్లు పోలీసులు గుర్తించారు. అంతేకాదు, అతడి వద్ద 50 లక్షల మంది సబ్‌స్క్రైబర్ల డేటా ఉంది. ఈ డేటాను ఎలా వినియోగిస్తాడో, ఏ మేరకు దుర్వినియోగం జరిగిందో అనే విషయంపై అధికారులు ప్రత్యేక దర్యాప్తు చేస్తున్న‌ట్లు సజ్జనార్ పేర్కొన్నారు. సజ్జనార్ వెల్లడించిన వివరాల్లో మరో షాకింగ్ పాయింట్.. రవి నేర చరిత్ర. మహారాష్ట్రలో ప్రహ్లాద్ పేరుతో నకిలీ డ్రైవింగ్ లైసెన్స్, పాన్ కార్డులు సృష్టించడం, విదేశీ పౌరసత్వం పొందటం, ఇలాంటివన్నీ అతని అక్రమ కార్యకలాపాల పరిమాణాన్ని నిరూపిస్తున్నాయి. కాగా ఈ కేసులో ఇప్పటికే ఇద్దరిని అరెస్ట్ చేయగా, రవిపై ఐటీ, కాపీరైట్ చట్టాల కింద మొత్తం ఐదు కేసులు నమోదు చేశారు.