ఇమ్మడి రవి.. ఇప్పుడు తెలుగు రాష్ట్రాల్లో ఈ పేరే హాట్ టాపిక్. కొన్నేళ్లుగా ఐబొమ్మ అనే పైరసీ వెబ్ సైట్‌ను నిర్వహిస్తూ వందల కొద్దీ తెలుగు చిత్రాలను పైరసీ చేసి కోట్లల్లో ఫాలోవర్లను సంపాదించాడు ఈ వ్యక్తి. రిలీజ్ రోజే హెచ్డీ ప్రింట్లను అందుబాటులోకి తేవడం ద్వారా తెలుగు సినీ పరిశ్రమను మామూలుగా దెబ్బ కొట్టలేదు ఈ రవి. ఇండస్ట్రీలో లోటు పాట్ల గురించి ప్రస్తావించి పాఠాలు చెప్పడం, దమ్ముంటే పట్టుకోండి అంటూ పోలీసులకు సవాలు విసరడం.. ఇలా రవి గురించి చెప్పడానికి చాలానే ఉంది. ఐతే పోలీసులకు సవాలు విసిరిన రెండు నెలలకే అతను పట్టుబడ్డాడు. ఫ్రాన్స్ నుంచి హైదరాబాద్‌‌కు వచ్చిన అతణ్ని పోలీసులు చాకచక్యంగా పట్టుకున్నారు. దీంతో ఐబొమ్మ మూత పడింది. 

ఈ సందర్భంగా సినీ ప్రముఖులు చిరంజీవి, నాగార్జున, రాజమౌళి తదితరులతో కలిసి హైదరాబాద్ పోలీస్ కమిషనర్ సజ్జనార్ ప్రెస్ మీట్ పెట్టి రవి గురించి సంచలన విషయాలు వెల్లడించారు. రవి తన భార్య నుంచి విడాకులు పొందేందుకు హైదరాబాద్ వచ్చాడని.. ఆమెనే అతడి గురించి పోలీసులకు సమాచారం ఇచ్చిందని వార్తలు వస్తున్న సంగతి తెలిసిందే. ఈ ప్రచారాన్ని సజ్జనార్ ఖండించారు. అతడి గురించి ఎవ్వరూ సమాచారం ఇవ్వలేదని.. తామే నిఘా పెట్టి పట్టుకున్నామని తెలిపారు. రవి దగ్గర దొరికిన హార్డ్ డిస్కుల్లో ఏకంగా 21 వేల సినిమాలు ఉన్నట్లు ఆయన వెల్లడించడం షాకింగే. పైరసీ సినిమాల ద్వారా అతను ఏకంగా రూ.20 కోట్లు సంపాదించాడని ఆయన తెలిపారు. రవి 50కి పైగా మిర్రర్ పైరసీ వెబ్ సైట్లను నడుపుతున్నాడని.. అతడికి బెట్టింగ్ యాప్‌లతో సంబంధాలున్నాయని.. పైరసీ సైట్ల ద్వారా బెట్టింగ్ యాప్స్‌ను ప్రమోట్ చేసి కోట్లు సంపాదించాడని.. ఈ యాప్స్ ద్వారా ఎంతోమంది ప్రాణాలు పోయాయని ఆయన చెప్పారు. 

రవి దగ్గర 50 లక్షల మందికి పైగా వ్యక్తిగత డేటా ఉందని.. ఉచితంగా పైరసీ సినిమాలు చూస్తున్నాం కదా మనదేం పోయింది అనుకోవడానికి లేదని.. మన డేటాను ఆ వెబ్ సైట్లకు ఇస్తున్నామనే స్పృహ కలిగి ఉండాలని.. దీంతో పాటు బెట్టింగ్ యాప్స్ ఉచ్చులో పడతారని ఆయన హెచ్చరించారు. రవి పోలీసులకు చిక్కకుండా ఫేక్ నేమ్‌తో డ్రైవింగ్ లైసెన్స్, పాన్ కార్డులు తీసుకున్నాడని.. పైరసీ చేసినా పట్టుబడకుండా ఇండియన్ సిటిజన్‌షిప్ వదులుకుని.. కరీబియన్ దీవుల్లోని సెయింట్ కిట్స్ పౌరసత్వం తీసుకుని అక్కడి నుంచే ఐబొమ్మ సైట్‌ను నిర్వహిస్తూ వచ్చాడని సజ్జనార్ తెలిపారు. రవి 110 డొమైన్లు కొనుక్కున్నాడని.. ఒక ఐపీ మీద సైట్‌ను బ్లాక్ చేసినా.. ఇంకోదానికి మారిపోయేవాడని.. అమెరికా, స్విట్జర్లాండ్, నెదర్లాండ్స్ లాంటి దేశాల్లో సర్వర్లను పెట్టి సైట్‌ను నడిపాడని ఆయన వెల్లడించారు. ఈ పైరసీ రాకెట్లో ఉన్న మిగతా వాళ్లను కూడా బయటికి తీసుకొస్తామని ఆయన స్పష్టం చేశారు.