దశాబ్దాల పాటు తిరుగులేని రాజకీయ శక్తిగా ఎదుగుతూ, దేశ రాజకీయ పటంలో ప్రతిపక్షాలనే శ్వాసించనీయకుండా చేసిన భారతీయ జనతా పార్టీ (BJP) ఇప్పుడు సరికొత్త సవాళ్లను ఎదుర్కొంటోంది. నిరంతరం విజయాల బాటలో దూసుకెళ్లిన ఆ పార్టీకి, కాలం మారుతున్న కొద్దీ రాజకీయ సమీకరణాలు ప్రతికూలంగా మారుతున్నాయి. ఒకప్పుడు ఎలాంటి ఒత్తిళ్లకైనా తలవంచని కమలదళం, ఇప్పుడు వరుస ప్రజా ఉద్యమాల ఉధృతికి ఉక్కిరిబిక్కిరి అవుతోంది.

ఒకప్పుడు దేశ రాజకీయాలను ఏకచక్రాధిపత్యంగా శాసించిన బీజేపీకి, ఇటీవల కాలంలో పరిస్థితులు పూర్తిగా వ్యతిరేకంగా మారుతున్నాయి. కేవలం ప్రధాన ప్రతిపక్షాల నుంచే కాకుండా, ఊహించని రీతిలో పుట్టుకొచ్చిన చిన్న చిన్న నిరసన వేదికలు, జనబాహుళ్య ఉద్యమాలు మోడీ సర్కార్‌ను ఇరుకున పెడుతున్నాయి. ముఖ్యంగా దేశవ్యాప్తంగా సంచలనం సృష్టించిన నీట్ (NEET) వివాదం బీజేపీ రాజకీయ చరిత్రలో ఒక చీకటి అధ్యాయాన్ని లిఖించిందనే చెప్పాలి. దశాబ్ద కాలంగా ఏ విషయంలోనూ వెనక్కి తగ్గ‌ని అధికార పక్షం, ఈసారి మాత్రం ప్రజాగ్రహం ముందు తలవంచక తప్పలేదు.

నీట్ ఉద్యమం తెచ్చిన రాజకీయ ఒత్తిడితో కేంద్ర విద్యాశాఖ మంత్రిగా ఉన్న ధర్మేంద్ర ప్రధాన్(Dharmendra Pradhan) తన పదవికి రాజీనామా చేయాల్సి వచ్చింది. మోడీ హ్యాట్రిక్ ప్రభుత్వంలో ఇది అత్యంత కీలకమైన పరిణామం. ఈ ఒక్క రాజీనామాతో కేంద్ర మంత్రివర్గంలో తొలి వికెట్ పడిపోయింది. ఈ పరిణామం కేవలం ఒక మంత్రి పదవి నష్టపోవడమే కాదు, ప్రభుత్వ పట్టు సడలుతోందనే సంకేతాన్ని దేశవ్యాప్తంగా ఉన్న రాజకీయ ప్రత్యర్థులకు స్పష్టంగా అందించింది.

నీట్ ఉద్యమం సాధించిన అనూహ్య విజయంతో ఉత్సాహం తెచ్చుకున్న విపక్షాలు, ఇతర ప్రజా సంఘాలు ఇప్పుడు కేంద్ర ప్రభుత్వ నిర్ణయాలపై నేరుగా యుద్ధం ప్రకటించాయి. సామాజిక మాధ్యమాల వేదికగా పుట్టుకొస్తున్న వినూత్న నిరసనలు బీజేపీ పెద్దలకు నిద్ర లేకుండా చేస్తున్నాయి. ఇథనాల్ బ్లెండెడ్ పెట్రోల్ (E20) విధానంపై ప్రజల్లో పెరుగుతున్న వ్యతిరేకత ఇప్పుడు మరో పెద్ద రాజకీయ తుఫాన్‌కు తెరలేపింది. భారత్-అమెరికా వాణిజ్య ఒప్పందాల నేపథ్యంలో బలవంతంగా రుద్దుతున్న ఈ ఇంధన విధానం వాహనాల పనితీరును దెబ్బతీస్తోందంటూ విమర్శలు వ్యక్తమవుతున్నాయి. నార్మల్ పెట్రోల్ కావాలా లేక ఈ ఇంధనమా అనేది వినియోగదారుల ఎంపికకే వదిలేయాలని డిమాండ్లు ఊపందుకుంటున్నాయి.

ఇదే అదనుగా భావించిన ఆమ్ ఆద్మీ పార్టీ (AAP) సహా ఇతర విపక్షాలు కేంద్ర ప్రభుత్వంపై సమరశంఖం పూరించాయి. E20 విధానాన్ని వెనక్కి తీసుకోవాలని డిమాండ్ చేస్తూ ఏకంగా ప్రధాని నివాసాన్ని ముట్టడించేందుకు సిద్ధమవుతున్నాయి. ప్రభుత్వ మొండి వైఖరి వీడకపోతే మంత్రివర్గంలో త్వరలోనే మరిన్ని వికెట్లు పడటం ఖాయమంటూ ప్రత్యర్థులు హెచ్చరిస్తున్నారు. మొత్తానికి, తిరుగులేని శక్తిగా వెలిగిన బీజేపీకి ఈ ప్రజా ఉద్యమాలు ఒక గట్టి హెచ్చరికగా మారుతున్నాయి. రాబోయే రోజుల్లో ఈ వ్యతిరేక పవనాలు ఏ పరిణామాలకు దారితీస్తాయో చూడాలి.