రాజకీయాల్లో ఏ క్షణాన ఏం జరుగుతుందో ఊహించడం అంత తేలిక కాదు. ఒకప్పుడు ప్రభంజనం సృష్టించిన నాయకులు కూడా మరుసటి ఎన్నికల నాటికి అనూహ్య పరిస్థితులను ఎదుర్కోవాల్సి వస్తుంది. సరిగ్గా అలాంటి అనూహ్య పరిణామాన్నే అల్లూరి సీతారామరాజు జిల్లా(Alluri District) రాజకీయం ఇప్పుడు ప్రపంచానికి చూపించింది. పాతికేళ్లకే పార్లమెంట్ మెట్లుెక్కి వార్తల్లో నిలిచిన ఒక నేత, కొన్నేళ్ల వ్యవధిలోనే స్థానిక పోరులో ఓటమి చవిచూడటం రాజకీయ వర్గాల్లో తీవ్ర చర్చనీయాంశంగా మారింది.

2019 సార్వత్రిక ఎన్నికల్లో అరకు లోక్‌సభ స్థానం నుంచి పోటీ చేసిన గొడ్డేటి మాధవి(Goddeti Madhavi) రికార్డు స్థాయి మెజారిటీతో విజయం సాధించి అందరి దృష్టినీ ఆకర్షించారు. రెండున్నర లక్షలకు పైగా ఓట్ల తేడాతో ఎంపీగా గెలిచి ఢిల్లీకి వెళ్లిన ఆమె, వైఎస్సార్ కాంగ్రెస్ పార్టీలో యువ నాయకత్వానికి ప్రతీకగా నిలిచారు. అయితే కాల చక్రం తిరిగేసరికి, అదే మాజీ ఎంపీ కొయ్యూరు జెడ్పీటీసీగా పోటీ చేయాల్సి రావడం, అక్కడ భారీ తేడాతో ఓటమి పాలుకావడం అందరినీ ఆశ్చర్యానికి గురిచేసింది.

వైసీపీ(YCP)కి సుదీర్ఘకాలంగా బలమైన కోటగా ఉన్న అల్లూరి జిల్లాలో ఈ ఓటమి పార్టీకి పెద్ద షాక్ అనే చెప్పాలి. 2014 నుంచి జిల్లా వ్యాప్తంగా ఫ్యాన్ గాలి బలంగా వీచడం, ఇటీవల ఎన్నికల్లోనూ అరకు ఎంపీతో పాటు ఎమ్మెల్యే సీట్లు వైసీపీ పరం కావడంతో జెడ్పీ పీఠం సునాయాసంగా దక్కుతుందని భావించారు. ఈ ధీమాతోనే అధిష్ఠానం మాజీ ఎంపీ మాధవిని కొయ్యూరు జెడ్పీటీసీ స్థానంలో బరిలోకి దించింది. అయితే గతంలో వామపక్షాలకు, ఆ తర్వాత వైసీపీకి మద్దతుగా నిలిచిన కొయ్యూరు ఓటర్లు ఈసారి మాత్రం భిన్నమైన తీర్పునిచ్చారు.

ఒక మాజీ ఎంపీగా ఉంటూ ఒక మండల పరిధిలో తన ప్రభావాన్ని చాటలేకపోవడం వెనుక స్థానిక సమీకరణాలు ఉన్నాయా లేదా సొంత పార్టీలోని వర్గపోరు దెబ్బకొట్టిందా అనే విశ్లేషణలు మొదలయ్యాయి. ప్రస్తుతం జిల్లాలోని ఇతర జెడ్పీటీసీ(ZPTC) స్థానాల్లో పోటీ నెలకొన్నప్పటికీ, ఒకప్పుడు ఎంపీగా జయకేతనం ఎగురవేసిన నాయకురాలు ఇలా స్థానిక పోరులో భంగపాటుకు గురికావడం మాత్రం వైసీపీ శ్రేణులకు జీర్ణించుకోలేని విషయంగా మారింది. ఈ ఊహించని దెబ్బతో పార్టీ అల్లూరి జిల్లాలో తన రాజకీయ వ్యూహాలను పునఃపరిశీలించుకోవాల్సిన పరిస్థితి ఏర్పడింది.