తమిళనాడు రాజకీయాల్లో సరికొత్త సమీకరణాలు, సంచలనాలకు తెరలేచింది. ఇటీవల జరిగిన ఎన్నికల్లో దళపతి విజయ్(Thalapathy Vijay) నేతృత్వంలోని పార్టీ ఘనవిజయం సాధించడంపై సూపర్ స్టార్ రజినీకాంత్ చేసిన వ్యాఖ్యలు ఇప్పుడు కోలీవుడ్ నుంచి పొలిటికల్ సర్కిల్స్ వరకు పెను తుఫాను సృష్టిస్తున్నాయి. తమిళ జనం మార్పును కోరుకున్నారని, అందుకే విజయ్‌కు పట్టం కట్టారని తలైవా విశ్లేషించారు. అయితే, ఇదే సమయంలో ఆయన చేసిన ఒక వ్యాఖ్య ఇప్పుడు అందరినీ నోరెళ్లబెట్టేలా చేస్తోంది. "తానే గనక రాజకీయ పార్టీ పెట్టి ఉంటే.. కచ్చితంగా గెలిచి తీరేవాడినని" రజినీకాంత్ క్లియర్ కట్ స్టేట్‌మెంట్ ఇచ్చారు.

ఎన్నికల ఫలితాల తర్వాత డీఎంకే అధినేత, మాజీ ముఖ్యమంత్రి స్టాలిన్‌ను(Stalin) రజినీకాంత్ ప్రత్యేకంగా కలవడంపై తీవ్ర విమర్శలు వచ్చాయి. దీనిపై తలైవా గట్టిగానే స్పందించారు. స్టాలిన్ తనకు రాజకీయ నాయకుడి కంటే ముందు మంచి స్నేహితుడని, కేవలం ఆ సాన్నిహిత్యంతోనే కలిశానని స్పష్టం చేశారు. తనకు రాజకీయాలతో ఎలాంటి సంబంధం లేదని, కేవలం స్నేహపూర్వక భేటీని కొందరు వివాదం చేయాలని చూస్తున్నారని మండిపడ్డారు.

ఇక యంగ్ సీఎం విజయ్‌తో పోలికలపై రజినీకాంత్(Rajinikanth) చాలా ఓపెన్‌గా మాట్లాడారు. విజయ్ ఎదుగుదలను అడ్డుకోవడానికి తాను ఎలాంటి ప్రయత్నాలు చేయలేదని, అసలు ఆయనను తనకు సమవుజ్జీగా భావించడం లేదని తేల్చి చెప్పారు. తమ ఇద్దరి మధ్య పాతికేళ్ల వయసు వ్యత్యాసం ఉందని గుర్తు చేశారు. ఒకవేళ తన సమకాలీనుడైన కమల్ హాసన్ సీఎం అయితే తాను అసూయపడతానేమో కానీ, విజయ్ విషయంలో అలాంటి భావనలు ఏవీ లేవని రజినీకాంత్ క్లారిటీ ఇచ్చారు. సినిమా ఇండస్ట్రీని శాసించిన సూపర్ స్టార్.. ఇప్పుడు పాలిటిక్స్ స్క్రీన్‌పై కూడా తన మాటలతో సెగలు రేపుతున్నారు.