సాంకేతికత మనిషి జీవితాన్ని సులభతరం చేయాల్సింది పోయి, నేడు కొందరి చేతుల్లో వినాశనానికి, వేధింపులకు ఆయుధంగా మారుతోంది. ముఖ్యంగా ఆర్టిఫిషియల్ ఇంటెలిజెన్స్ (AI) పుణ్యమా అని సెలబ్రిటీలు, మహిళల వ్యక్తిగత గౌరవానికి భంగం కలిగించేలా డీప్‌ఫేక్ వీడియోలు పుట్టుకొస్తున్నాయి. తాజాగా 'దేవర(Devara)' సినిమాలోని సూపర్ హిట్ సాంగ్ 'చుట్టమల్లే' వీడియోను ఏఐ సాయంతో మార్ఫింగ్ చేసి సామాజిక మాధ్యమాల్లో వైరల్ చేయడం టాలీవుడ్‌‌లో కలకలం రేపింది. ఈ నీచమైన చర్యపై జూనియర్ ఎన్టీఆర్ తీవ్ర స్థాయిలో మండిపడ్డారు.

మహిళలను దేవతలుగా, తల్లులుగా గౌరవించే భారతీయ సంస్కృతిని గుర్తుచేస్తూ ఎన్టీఆర్(NTR) ఎక్స్ వేదికగా తన ఆవేదనను, ఆగ్రహాన్ని వెళ్లగక్కారు. ఒక మహిళను కించపరిచేలా ఏఐ టెక్నాలజీని దుర్వినియోగం చేయడం అత్యంత హేయమైన చర్య అని ఆయన అభివర్ణించారు. "మాతృదేవోభవ" అనే నినాదం ఉన్న మన సమాజంలో కొందరు వ్యక్తులు ఇంతటి నీచ స్థాయికి దిగజారడం సిగ్గుచేటని విమర్శించారు. ‘చుట్టమల్లే’ పాటను మార్ఫింగ్ చేసిన ఆ కేటుగాళ్లను ఎట్టి పరిస్థితుల్లోనూ వదిలిపెట్టబోనని, చట్టపరంగా కఠిన చర్యలు తీసుకుంటానని హెచ్చరించారు.

ఇలాంటి అసభ్యకరమైన కంటెంట్‌ను ఎవరూ ప్రోత్సహించవద్దని, సోషల్ మీడియాలో కనిపిస్తే షేర్ లేదా డౌన్‌లోడ్ చేయకుండా వెంటనే రిపోర్ట్ చేయాలని ఎన్టీఆర్(Jr NTR) ప్రజలకు విజ్ఞప్తి చేశారు. నేడు వేరొక మహిళకు జరిగిన ఈ అవమానం, రేపు ఎవరి ఇంట్లోని వారికైనా ఎదురుకావచ్చని హెచ్చరించారు. ఏఐ సాంకేతికత దుర్వినియోగాన్ని అరికట్టేందుకు, బాధ్యులపై కఠిన శిక్షలు అమలు చేసేందుకు కేంద్ర, రాష్ట్ర ప్రభుత్వాలు తక్షణమే కఠినమైన చట్టాలు తీసుకురావాలని ఆయన గట్టిగా డిమాండ్ చేశారు.

అయితే కేవలం ఎన్టీఆర్ మాత్రమే కాకుండా, ఇటీవల కాలంలో ఆర్టిఫిషియల్ ఇంటెలిజెన్స్ మార్ఫింగ్ ఫొటోలు, వీడియోలు నటీమణులకు నరకం చూపిస్తున్నాయి. ‘అర్జున్ రెడ్డి’ ఫేమ్ శాలిని పాండే సైతం ఇలాంటి అసభ్యకరమైన ఏఐ వీడియోల బారిన పడి తీవ్ర ఆవేదన వ్యక్తం చేశారు. గతంలో రష్మిక మందన్న, కత్రినా కైఫ్, మృణాల్ ఠాకూర్, కీర్తి సురేశ్(Keerthy Suresh) వంటి ప్రముఖ హీరోయిన్లు సైతం డీప్‌ఫేక్ వీడియోల బాధితులే కావడం గమనార్హం. టెక్నాలజీని సద్వినియోగం చేసుకోవడం మానేసి, ఇలాంటి సైబర్ నేరాలకు పాల్పడుతున్న వారిపై నిఘా పెంచాల్సిన అవసరం ఎంతైనా ఉంది.