కూట‌మి పార్టీల త‌ర‌ఫున ఎంపిక చేసిన అభ్య‌ర్థుల‌ను గెలిపించే బాధ్య‌త విష‌యంలో మ‌త్రుల‌కు మంచి మార్కులు ప‌డుతున్నాయి.  ముఖ్యమంత్రి చంద్రబాబు నాయుడు ముందుగానే హెచ్చరించినట్లుగా, మంత్రులు తమ సొంత నియోజకవర్గాలపై ప్రత్యేక శ్రద్ధ పెట్టారు. దీంతో మంత్రుల ప్రాతినిధ్యం వహిస్తున్న దాదాపు అన్ని మున్సిపాలిటీలు, నగర పంచాయతీలలో కూటమి అభ్యర్థులు భారీ మెజారిటీలతో విజయం సాధించారు. మంత్రి నారా లోకేష్, డిప్యూటీ సీఎం పవన్ కళ్యాణ్‌(Deputy Pawan Kalyan)తో పాటు మంత్రులు సత్యకుమార్ యాదవ్, వాసంశెట్టి సుభాష్ వంటి నేతలు క్షేత్రస్థాయిలో విస్తృతంగా పర్యటించి అభివృద్ధి, కేంద్ర నిధుల కేటాయింపులను ప్రజల్లోకి బలంగా తీసుకెళ్లారు.

సీఎం చంద్రబాబు నాయుడు మంత్రులను కేవలం తమ నియోజకవర్గాలకే పరిమితం కాకుండా, తమకు కేటాయించిన ఇన్-ఛార్జ్ జిల్లాల్లోనూ సమన్వయకర్తలుగా వ్యవహరించాలని ఆదేశించారు. టీడీపీ(TDP), జనసేన, బీజేపీ పార్టీల స్థానిక నాయకుల మధ్య టిక్కెట్ల కేటాయింపులో వచ్చిన వివాదాలను, రెబెల్స్ సమస్యలను మంత్రులు సకాలంలో పరిష్కరించి కూటమి ధర్మాన్ని కాపాడటంలో కీలక పాత్ర పోషించారు. మంత్రుల సమన్వయం,  వ్యూహా ల ఫలితంగా ఏపీలోని 13 మున్సిపల్ కార్పొరేషన్లలో 12 చోట్ల కూటమి మేయర్ పీఠాలను దక్కించుకుంది.

ముఖ్యంగా విశాఖపట్నం, విజయవాడ, గుంటూరు, తిరుపతి, నెల్లూరు, వైఎస్సార్సీపీకి కంచు కోటగా భావించే కడప కార్పొరేషన్‌లలోనూ కూటమి చారిత్రాత్మక విజయం సాధించింది. జగన్(Jagan) సొంత నియోజకవర్గమైన పులివెందుల మున్సిపాలిటీలోనూ కూటమి అఖండ విజయం సాధించడం వెనుక కూటమి నేతల, మంత్రుల సమిష్టి వ్యూహం  స్పష్టంగా కనిపించింది. కేవలం అనంతపురం కార్పొరేషన్‌లో మాత్రమే బీజేపీ అభ్యర్థిపై వైసీపీ విజయం సాధించింది.  ఈ స్థానిక ఎన్నికల విజయం కూటమి ప్రభుత్వం గత రెండున్నరేళ్లుగా అందిస్తున్న సుపరిపాలన, సంక్షేమ పథకాలు, మరియు పట్టణాభివృద్ధి కార్యక్రమాలకు ప్రజలు ఇచ్చిన తీర్పుగా భావిస్తున్నారు.

ఎన్నికల ఫలితాల అనంతరం సీఎం చంద్రబాబు(CM Chandrababu Naidu) మంత్రుల పనితీరు, ఫైళ్ల క్లియరెన్స్ వేగం మరియు ప్రజల్లో వారికున్న ఆదరణపై ప్రత్యేక ప్రోగ్రెస్ రిపోర్ట్/గ్రాఫ్స్ కూడా సిద్ధం చేయిస్తున్నట్లు రాజకీయ వర్గాల్లో ప్రచారం జరుగుతోంది. ఇక‌, ఇప్ప‌టి వ‌ర‌కు మంత్రులు గొట్టిపాటి ర‌వి, స‌విత‌, బీసీ జ‌నార్ద‌న్‌రెడ్డి, మండ‌ప‌ల్లి రాంప్ర‌సాద్ రెడ్డి, కొండ‌ప‌ల్లి శ్రీనివాస‌రావు వంటి తొలిసారి మంత్రులుగా చేస్తున్న‌వారిని చంద్ర‌బాబు అభినందించారు. వారి ప‌నితీరు.. క్షేత్ర‌స్థాయిలో వారు చూపిన వేగం.. వంటివి ఎన్నిక‌ల్లో స్ప‌ష్టంగా క‌నిపించాయ‌న్న‌ది చంద్ర‌బాబు చెబుతున్న మాట‌.