అనంతపురం జిల్లా రాప్తాడు(Raptadu) మండల కేంద్రంలోని ప్రభుత్వ పాఠశాలలో చోటుచేసుకున్న ఉన్మాద ఘటన రాష్ట్రవ్యాప్తంగా తీవ్ర సంచలనం రేపింది. ప్రశాంతంగా సాగిపోవాల్సిన బడిలో ఒక్కసారిగా చెలరేగిన అభద్రతా వాతావరణం, తోటి విద్యార్థుల కళ్లెదుటే జరిగిన దారుణం అందరినీ దిగ్భ్రాంతికి గురిచేసింది.

ఉదయం పాఠశాల సాధారణ రోజులాగే ప్రారంభమైంది. పిల్లల రాకపోకలతో ఆవరణ సందడిగా మారింది. సెకండ్ హవర్ క్లాసులు నడుస్తున్న సమయంలో అనూహ్యంగా ఓ దుండగుడు కాంపౌండ్ వాల్ దూకి లోపలికి ప్రవేశించాడు. ఎవరికీ ఎలాంటి అనుమానం రాకుండా నేరుగా పదో తరగతి గదిలోకి అడుగుపెట్టాడు. అక్కడ పాఠాలు వింటున్న ఒక విద్యార్థినిని లక్ష్యంగా చేసుకున్నాడు. తన వెంట తెచ్చుకున్న పదునైన రంపంతో ఆ బాలికపై విచక్షణారహితంగా దాడికి పాల్పడ్డాడు. ఈ ఊహించని పరిణామానికి క్లాస్‌రూమ్‌(Classroom)లోని విద్యార్థులు భయంతో పరుగులు తీశారు. వారి కేకలతో పాఠశాల ప్రాంగణం ఒక్కసారిగా అట్టుడికిపోయింది. ఈ కిరాతక దాడిలో బాలిక కుడిచేయి తీవ్రంగా గాయపడి తెగిపడగా, ముఖంపై, శరీర ఇతర భాగాలపై తీవ్ర గాయాలయ్యాయి. రక్తపు మడుగులో చిన్నారి విలవిలలాడుతుండటం చూసి ఉపాధ్యాయులు, తోటి విద్యార్థులు కంటతడి పెట్టారు.

వెంటనే స్పందించిన పాఠశాల సిబ్బంది, స్థానికులు తీవ్రంగా గాయపడిన బాలికను చికిత్స నిమిత్తం అనంతపురం ప్రభుత్వ సర్వజన ఆసుపత్రికి తరలించారు. ప్రస్తుతం ఆమె పరిస్థితి అత్యంత విషమంగా ఉందని వైద్యులు తెలిపారు. పాఠశాలల్లో విద్యార్థుల భద్రత ఏమాత్రం లేదనేదానికి ఈ ఘటనే ప్రత్యక్ష ఉదాహరణగా నిలుస్తుండటంతో స్థానికులు, విద్యార్థి సంఘాలు(Student Unions) తీవ్ర ఆగ్రహం వ్యక్తం చేస్తున్నాయి.

ఇక ఈ దారుణంపై ముఖ్యమంత్రి చంద్రబాబు(CM Chandrababu) తీవ్ర ఆవేదన వ్యక్తం చేశారు. బాధితురాలి ఆరోగ్య పరిస్థితిని నిరంతరం పర్యవేక్షిస్తూ, నిందితుడిపై కఠిన చర్యలు తీసుకోవాలని అధికారులను ఆదేశించారు. మరోవైపు విద్యాశాఖ మంత్రి నారా లోకేశ్ తీవ్ర విచారం వ్యక్తం చేశారు. చిన్నారిని ఆ స్థితిలో చూసి గుండె బరువెక్కిందని ఆవేదన వ్యక్తం చేసిన ఆయన.. ఉన్మాదులను ఉక్కుపాదంతో అణిచివేస్తామని, ఆడపిల్లల వైపు కన్నెత్తి చూసేందుకు కూడా భయపడేలా కఠిన శిక్షలు ఉంటాయని హెచ్చరించారు. మరోవైపు పోలీసులు ఈ ఘటనను అత్యంత సీరియస్‌గా తీసుకున్నారు. ప్రత్యేక బృందాలను రంగంలోకి దించి గాలింపు చర్యలు ముమ్మరం చేయగా.. నిందితుడు ధర్మవరంలో పట్టుబడినట్లు సమాచారం అందింది. ప్రస్తుతం నిందితుడ్ని పోలీసులు విచారిస్తున్నారు. నిందితుడు సదరు బాలికకు మేనమామగా తెలుస్తోంది.