గ్లోబల్ స్టార్ రామ్ చరణ్, క్రియేటివ్ జీనియస్ సుకుమార్ కాంబినేషన్ అనగానే టాలీవుడ్‌లో అంచనాలు తారాస్థాయికి చేరతాయి. ఇండస్ట్రీని షేక్ చేసిన 'రంగస్థలం' తర్వాత ఈ క్రేజీ డైనమిక్ డ్యుయో మరోసారి జట్టుకడుతున్న ప్రాజెక్ట్ కావడంతో 'RC17'పై మొదటి నుంచీ భారీ హైప్ ఉంది. అయితే ఈ సినిమాకు సంబంధించి క్యాస్టింగ్ విషయంలో ప్రతి రోజూ రకరకాల వార్తలు సోషల్ మీడియాను షేక్ చేస్తున్నాయి. ముఖ్యంగా రామ్ చరణ్ పక్కన హీరోయిన్ ఎవరు అనే దానిపై రకరకాల పేర్లు తెరపైకి వస్తూనే ఉన్నాయి.

తాజాగా ఈ రేసులో ఓ అనూహ్యమైన యువ నటి పేరు గట్టిగా వినిపిస్తోంది. చైల్డ్ ఆర్టిస్ట్‌గా కెరీర్ స్టార్ట్ చేసి `ధురంధర్ `తో బాలీవుడ్ లో సెన్సేష‌న్ సృష్టించిన‌ సారా అర్జున్(Sara Arjun) పేరు ఇప్పుడు టాలీవుడ్ సర్కిల్స్‌లో హాట్ టాపిక్‌గా మారింది. చరణ్ సరసన ఆమెను కథానాయకిగా ఫైనల్ చేసినట్లు ఫిలింనగర్ లో పెద్ద ఎత్తున గుసగుసలు వినిపిస్తున్నాయి. ఒకవేళ ఇదే నిజమైతే, గ్లోబల్ స్టార్ పక్కన ఈ యంగ్ బ్యూటీ జోడీ తెరపై ఎలా ఉంటుందనే చర్చ ఇప్పుడు సినిమా వర్గాల్లో ఆసక్తికరంగా మారింది. ఇద్దరి మధ్య ఏజ్ గ్యాప్, ఆన్-స్క్రీన్ కెమిస్ట్రీ ఎలా వర్కవుట్ అవుతుందనే దానిపై నెటిజన్లు రకరకాలుగా విశ్లేషిస్తున్నారు.

కేవలం హీరోయిన్ వార్త మాత్రమే కాదు, ఈ చిత్రంలో మరో కీలక పాత్ర కోసం లేడీ సూపర్ స్టార్ నయనతార(Nayanthara)ను కూడా రంగంలోకి దించుతున్నట్లు సమాచారం. సుకుమార్ ఈసారి తనదైన మార్క్ రూరల్ అండ్ పవర్ ఫుల్ మాస్ ఎంటర్‌టైనర్‌ను సిద్ధం చేసినట్లు తెలుస్తోంది. ఈ ప్రాజెక్ట్‌ను రెండు భాగాలుగా కాకుండా, ఒకే పార్ట్‌గా పాన్ ఇండియా స్థాయిలో అత్యంత భారీ బడ్జెట్‌తో తెరకెక్కించనున్నారు.

ప్రస్తుతం రామ్ చరణ్(Ram Charan) రెస్ట్ తీసుకుంటుండగా, ఈ ఏడాది చివర్లో ఈ సినిమా రెగ్యులర్ షూటింగ్ పట్టాలెక్కే అవకాశం ఉంది. మైత్రి మూవీ మేకర్స్ అత్యంత ప్రతిష్ఠాత్మకంగా నిర్మిస్తున్న ఈ చిత్రంపై వస్తున్న ఈ సరికొత్త రూమర్లు సినిమాపై అంచనాలను రెట్టింపు చేస్తున్నాయి. మరి ఈ ప్రచారంలో ఎంత నిజముందో తెలియాలంటే సుకుమార్ అండ్ కో అధికారికంగా స్పందించే వరకు వేచి చూడాల్సిందే.