తాను ప్రాతినిధ్యం వహిస్తున్న సొంత నియోజకవర్గాన్ని నెక్స్ట్ లెవెల్ డెవలప్‌మెంట్ వైపు తీసుకెళ్లేందుకు ముఖ్యమంత్రి చంద్రబాబు నాయుడు మాస్టర్ ప్లాన్ రెడీ చేశారు. కేవలం ప్రకటనలకే పరిమితం కాకుండా, గ్రౌండ్ లెవెల్‌లో అభివృద్ధిని పరుగులు పెట్టిస్తూ కుప్పం ప్రజలకు అదిరిపోయే సర్‌ప్రైజ్‌లు ఇస్తున్నారు. తాజాగా ఒకే రోజు వందల కోట్ల రూపాయల విలువైన ప్రాజెక్టులకు శ్రీకారం చుట్టి స్థానిక ప్రజలకు ఊహించని కానుకలు అందించారు.

కుప్పాన్ని అన్ని రంగాల్లోనూ ఆదర్శంగా నిలపాలనే లక్ష్యంతో అడుగులు పడుతున్నాయి. ఇందులో భాగంగానే అడ్మినిస్ట్రేటివ్ సెక్టార్‌ను మరింత పటిష్టం చేసే దిశగా అడుగులు వేశారు. కేవలం పాలనా సౌలభ్యం కోసమే కాకుండా, స్థానికంగానే అన్ని సేవలు అందుబాటులో ఉండేలా రూ. 10 కోట్ల భారీ వ్యయంతో నూతన ఆర్డీఓ, ఏఎస్పీ కార్యాలయాల భవన నిర్మాణాలకు శంకుస్థాపన చేశారు. దీంతో పరిపాలనా పరమైన ఇబ్బందులు పూర్తిగా తొలగిపోనున్నాయి.

మరోవైపు మున్సిపాలిటీ పరిధిలో ఏకంగా రూ. 38 కోట్ల విలువైన వివిధ ప్రభుత్వ అభివృద్ధి పనులకు భూమిపూజ నిర్వహించారు. పారిశుద్ధ్య రంగానికి అత్యంత ప్రాధాన్యతనిస్తూ రూ. 3.30 కోట్లతో అత్యాధునిక హంగులతో కూడిన సమీకృత ఘన వ్యర్థాల నిర్వహణ ప్లాంట్‌ను, మెటీరియల్ రికవరీ కేంద్రాన్ని ప్రజలకు అందుబాటులోకి తెచ్చారు. ఇక విద్యారంగానికి పెద్దపీట వేస్తూ మల్లనూరులో రూ. 2.70 కోట్ల అంచనా వ్యయంతో 10 ఎకరాల విశాలమైన స్థలంలో జూనియర్ కళాశాల నిర్మాణ పనులకు పచ్చజెండా ఊపారు.

వ్యవసాయ రంగంలో రైతన్నలకు నిరంతరం నాణ్యమైన విద్యుత్ అందించే లక్ష్యంతో మరో కీలక నిర్ణయం తీసుకున్నారు. ఫీడర్ల కోసం ప్రత్యేకంగా రూపొందించిన 15 మెగావాట్ల పీఎం కుసుమ్ సోలార్ ప్రాజెక్టులను ప్రారంభించి అన్నదాతల కష్టాలకు చెక్ పెట్టారు. ఇలా ఒకే రోజు శంకుస్థాపనలు, ప్రారంభోత్సవాలతో బిజీబిజీగా గడిపిన సీఎం చంద్రబాబు, తన నియోజకవర్గ అభివృద్ధే ధ్యేయంగా దూసుకెళ్తుండటంతో కుప్పం ప్రజలు హర్షం వ్యక్తం చేస్తున్నారు.