తెలంగాణ(Telangana) రాజకీయాల్లో మరోసారి ఎన్నికల వేడి తారాస్థాయికి చేరుకుంటోంది. గ్రేటర్ హైదరాబాద్ పరిధిలోని అత్యంత ప్రతిష్టాత్మకమైన ఖైరతాబాద్ అసెంబ్లీ నియోజకవర్గానికి ఉప ఎన్నిక అనివార్యమవడంతో, రాష్ట్ర రాజకీయాల్లో ఒక్కసారిగా హీట్ పెరిగింది. అధికార, ప్రతిపక్షాల మధ్య మాటల యుద్ధం తారాస్థాయికి చేరింది. రాష్ట్రంలో అధికారంలో ఉన్న కాంగ్రెస్, ప్రధాన ప్రతిపక్షం బీఆర్ఎస్, దూకుడు పెంచుతున్న బీజేపీ... ఈ మూడు పార్టీలకు ఖైరతాబాద్ బై-ఎలక్షన్ కేవలం ఒక సాధారణ ఎన్నిక కాదు, భవిష్యత్తు రాజకీయ సమీకరణాలను శాసించే ప్రతిష్టాత్మక రణరంగంగా మారింది.మరి ఈ త్రిముఖ పోరులో గులాబీ దళం పట్టు నిలబడుతుందా? హస్తం పార్టీ హవా కొనసాగుతుందా? లేక కమల దళం పాత విజయాన్ని రిపీట్ చేస్తుందా? అన్నది ఇప్పుడు మిలియన్ డాలర్ల ప్రశ్నగా మారింది.

ఖైరతాబాద్‌ గడ్డపై పాగా వేయడానికి మూడు ప్రధాన పార్టీలు పావులు కదుపుతున్నాయి. అధికారంలో ఉన్న కాంగ్రెస్ పార్టీ నగరంలో ఇటీవలి కాలంలో జరిగిన ఉప ఎన్నికల విజయాల జోరును ఇక్కడా రిపీట్ చేయాలని పట్టుదలగా ఉంది. ప్రభుత్వ సంక్షేమ పథకాలు, అధికార బలంతో పాటు స్థానిక నాయకత్వ కూర్పుపై ఆ పార్టీ ప్రత్యేక దృష్టి సారించింది. మరోవైపు, గత రెండుసార్లు ఇక్కడ విజయఢంకా మోగించిన బీఆర్ఎస్(BRS)... తమ పట్టును సడలనివ్వకూడదని భావిస్తోంది. గులాబీ శ్రేణులను ఏకం చేస్తూ, ప్రభుత్వ వైఫల్యాలను ఎత్తిచూపుతూ మరోసారి గెలుపు జెండా ఎగరవేయాలని తహతహలాడుతోంది. ఇక ఏమాత్రం తక్కువ అంచనా వేయడానికి వీల్లేని బీజేపీ సైతం, గ్రేటర్‌లో తమ బలాన్ని నిరూపించుకునేందుకు ఈ ఉప ఎన్నికను వేదికగా మలుచుకోవాలని చూస్తోంది. గతంలో ఇక్కడ గెలిచిన అనుభవం, కేంద్ర ప్రభుత్వ పథకాలు, ప్రత్యామ్నాయ రాజకీయమే తమను గెలుపు తీరాలకు చేరుస్తుందని కమలనాథులు గట్టి ధీమాతో ఉన్నారు.

ప్రస్తుతానికి ఎన్నికల సంఘం నుంచి అధికారిక షెడ్యూల్ వెలువడాల్సి ఉండగానే, తెరవెనుక రాజకీయం మాత్రం ముమ్మరంగా సాగుతోంది. ఏ పార్టీకి ఆ పార్టీ గెలుపు తమదేనని ధీమా వ్యక్తం చేస్తున్నప్పటికీ, క్షేత్రస్థాయిలో పరిస్థితులు వేరుగా ఉండే అవకాశం ఉంది. ఈ బై-ఎలక్షన్‌లో విజయం సాధించాలంటే కేవలం పార్టీ బలం మాత్రమే సరిపోదు. సరైన అభ్యర్థి ఎంపిక, ప్రచార సరళి, చివరి నిమిషంలో ఓటర్లను ఆకట్టుకునే వ్యూహాలు అత్యంత కీలకం కానున్నాయి. మొత్తానికి, ఎవరి లెక్కలు ఎలా ఉన్నా... ఖైరతాబాద్(Khairatabad) పీఠాన్ని కైవసం చేసుకుని అసలు సిసలైన 'కింగ్'గా నిలిచేదెవరు? త్రిముఖ పోరులో ప్రజలు ఎవరి వైపు నిలవబోతున్నారు? అనే ప్రశ్నలకు సమాధానం దొరకాలంటే ఎన్నికల షెడ్యూల్ వచ్చే వరకు, అలాగే బరిలో నిలిచే అభ్యర్థులు ఖరారయ్యే వరకు వేచి చూడాల్సిందే.