విజయవాడ(Vijayawada) రాజకీయాలు ఎప్పుడూ ఒక ప్రత్యేకమైన మలుపుతో, ఉత్కంఠభరితంగా నడుస్తుంటాయి. ఇక్కడ ఏ చిన్న పరిణామం జరిగినా అది రాష్ట్ర రాజకీయాల్లో హాట్ టాపిక్ అవుతుంది. ముఖ్యంగా, రక్తం మరిపించే విజయవాడ పాత రోజులను తలపించేలా వంగవీటి కుటుంబానికి ఉన్న మాస్ ఫాలోయింగ్ గురించి ప్రత్యేకంగా చెప్పాల్సిన పనిలేదు. నేటికీ ఆ పేరు చుట్టూ అల్లుకున్న అభిమాన వలయం చెక్కుచెదరలేదు. గడిచిన అసెంబ్లీ ఎన్నికల సమయంలోనూ ఇదే చర్చ ప్రధానంగా నడిచింది. తెలుగుదేశం పార్టీ అధిష్టానం వంగవీటి రాధాకృష్ణను ప్రత్యక్ష ఎన్నికల బరిలోకి దింపాలని తీవ్రంగా ప్రయత్నించింది. ఎంపీ సీటు నుంచి అసెంబ్లీ స్థానాల వరకు అనేక ఆకర్షణీయమైన ఆప్షన్లు టేబుల్ మీద పెట్టింది.

అయినప్పటికీ, రాధా(Vangaveeti Radha) మాత్రం విజయవాడ సెంట్రల్ నియోజకవర్గం మినహా వేరే చోట పోటీ చేసేందుకు సుముఖత చూపలేదు. అయితే, అక్కడ అప్పటికే టీడీపీ(TDP) నుంచి బొండా ఉమామహేశ్వరరావు బలమైన నేతగా కొనసాగుతుండటం, గతంలో స్వల్ప తేడాతో ఓడిపోయిన నేపథ్యంలో ఆయనను కాదని సీటు కేటాయించడం సాధ్యపడలేదు. పార్టీ ప్రయోజనాలు, అంతర్గత సమీకరణలరీత్యా బొండాను పక్కన పెట్టలేక రాధా సైలెంట్ అయ్యారు. ప్రత్యక్ష ఎన్నికలకు దూరంగా ఉంటూ కేవలం పార్టీ విజయం కోసం మాత్రమే పనిచేశారు.

అయితే ఇన్నాళ్లూ సెంట్రల్ నియోజకవర్గంలో రాధా ఎంట్రీకి బొండా ఉమా(Bonda Uma)నే ప్రధాన అడ్డుగోడగా ఉన్నారనేది రాజకీయ విశ్లేషకుల మాట. కానీ, ఇటీవల వరుస వివాదాలు, ముద్రగడ సంతాప సభలో ప్రత్యర్థి పార్టీ అయిన వైసీపీ నేతలతో సాన్నిహిత్యం, నియోజకవర్గంలోని అంతర్గత విభేదాల కారణంగా బొండా ఉమ గ్రాఫ్ క్రమంగా తగ్గుతూ వస్తోంది. అధిష్టానం దృష్టిలో ఆయనపై నమ్మకం సడలడం, స్వయంకృతాపరాధాలతో ఆయన స్థానం ఇరకాటంలో పడింది. ఒకవైపు బొండా ఉమ తన రాజకీయ తప్పిదాలతో ఇబ్బందుల్లో పడుతుంటే, మరోవైపు వంగవీటి రాధాకు లైన్ క్లియర్ అవుతోందనే చర్చ జోరుగా సాగుతోంది. సెంట్రల్ గడ్డపై వంగవీటి కుటుంబానికి ఉన్న మాస్ ఇమేజ్ ముందర ప్రత్యర్థి ఎవరైనా గెలుపు నల్లేరు మీద నడకేనని టీడీపీ క్యాడర్ గట్టిగా నమ్ముతోంది. బొండా ఉమ రూపంలో ఉన్న ఏకైక అడ్డంకి తొలగిపోతుండటంతో, వచ్చే ఎన్నికలు లేదా రాజకీయ సమీకరణల నాటికి విజయవాడ సెంట్రల్ నుంచి వంగవీటి రాధాకృష్ణ ప్రత్యక్ష రాజకీయాల్లోకి రీ-ఎంట్రీ ఇవ్వడం ఖాయమనే ప్రచారం ఇప్పుడు రాజకీయ వర్గాల్లో ఊపందుకుంది.